Тарихы

ШЕЖІРЕЛІ ШАҢЫРАҚ

1937 жылы Оңтүстіктегі бірінші ашылған екі жылдық мұғалімдер институты  1954 жылы Шымкент педагогикалық институты болып қайта құрылды. 1993 жылы Шымкент педагогикалық институты ҚР үкіметінің қаулысымен Түркістан қаласында жаңадан ашылған Қ.А.Ясауи атындағы Халықаралық қазақ-түрік университетінің құрамына кірді. ҚР Үкіметінің 2011 жылғы 28 маусымдағы №722 қаулысымен Оңтүстік Қазақстан мемлекеттік педагогикалық институты қайта ашылды. Педагогикалық институт оңтүстік өңіріндегі ең алғашқы жоғары оқу орны болды. Осы уақыт аралығында еліміздің сол кезеңдегі маңдай алды алғашқы зиялылары, ғалым ұстаздары еңбек еткен қасиетті де киелі қара шаңырақ тек облыс көлемінде ғана емес, республикамыздың басқа да аймақтары үшін мыңдаған білікті маман педагогтарды даярлап шығарды.

Қазіргі таңда институттың беделін көтеру, мамандар сапасын жоғары деңгейге жеткізу үшін жүйелі жұмыстар жүргізілуде.

Оқу орнымызда 2012 жылдың қаңтарында халықаралық академиялық ұтқырлық орталығы ашылды. Академиялық ұтқырлық бағдарламасы аясында ОҚМПИ-дің филология факультеті шет тілі мамандығында оқитын 2,3-курстың 8 студенті Рига қаласындағы халықаралық Балтық академиясында білім алды. Ағылшын филологиясы кафедрасының оқытушысы Л.С. Қанаева «Болашақ» бағдарламасының  аясында Нидерланд мемлекетінде 3 айлық іс-тәжірибеден өтті. 2013 және 2014 жылдары Институтқа Кэмбридж, Гумбольдт, Лиссабон және Дрезден университеттерінен 7 ғалым келіп дәріс оқыды.  Институт оқытушылары шетелдік ғалымдармен бірге ортақ ғылыми жобаларды іске асыруда.

2013 жылдың мамырында Франция қаласының Жерс департаментінің сенаторы Эмери де Монтескьюмен институтымыздың оқытушы-профессорлар құрамы мен барлық оқу топтарының студенттері кездесті, пікір алысты.

Оңтүстік Қазақстан мемлекеттік педагогикалық институтында 2012 жылдың тамыз айының   28-жұлдызында белгілі жазушы-журналист «Егемен Қазақстан» республикалық газеті АҚ-ның президенті Сауытбек Абдрахмановтың 60 жылдығына байланысты әдеби - сазды кездесу кеші өтті, оған институт студенттері мен оқытушы-профессор құрамы қатысты. Іс-шарада елімізге белгілі қаламгерлер Фариза Оңғарсынова, Әбіш Кекілбаев, сонымен бірге Сәбит Оразбаев, Сейіт Қасқабасов секілді зиялы қауым өкілдерімен жүздесті.

Қазақстан Республикасының Президенті Н.Ә.Назарбаевтың «Қазақстан білім қоғамы жолында» атты лекциясын насихаттау жұмыстары барлық топтарда жүргізілді. Н.Ә.Назарбаевтың «Қазақстан білім қоғамы жолында» атты интерактивті лекциясын талдау мақсатында 2012 жылдың 10 қыркүйегі күні «Тәуелсіздіктің тірегі - білімді ұрпақ» атты дөңгелек үстел өткізілді. Дөңгелек үстелде институт оқытушы-профессорлары мен студенттері интерактивті лекцияға қатысты ой-пікірлерін ортаға салды. ҚР Президенті Н.Назарбаевтың «Жалпыға ортақ еңбек қоғамына қарай 20 қадам» мақаласын насихаттау бойынша барлық топтарда іс-шаралар жүргізілді.

2012 жылы қазан айының 18-20 күндері аралығында Оңтүстік Қазақстан мемлекеттік педагогикалық институтының құрылғанына 75 жыл толуына арналған  «Көптілді білім беру негізінде бәсекеге қабілетті тұлғаны қалыптастыру» атты халықаралық ғылым-тәжірибелік конференция мен мерекелік іс-шаралар өткізілді.  Мерейтойға елдің түкпір-түкпірінен елге белгілі тұлғалар, ақын-жазушылар, депутаттар, жоғары оқу орындарының ректорлары, институт түлектері мен осы институтта дәріс берген оқытушылар құрамы жиналды. Бұл мерейтойға барлық факультеттің студенттері белсене қатысты.

Оңтүстік Қазақстан мемлекеттік педагогикалық институтында Мәжіліс депутаттары Шалатай Мырзахметов, Розақұл Халмұрадов және Зухра Саяпова  студент жастармен кездесіп, жастарды толғандырып жүрген сұрақтар төңірегінде ой бөлісті. ОҚО Жастар саясаты мәселелері басқармасымен бірлесе отырып, институт қараша айында  «Болашақ бүгіннен басталады» акциясының аясында «Мемлекеттік рәміздер – егемендігіміздің белгісі» атты облыстық жастар форумын өткізді. Желтоқсан айының 20-сы күні институт шаңырағында «Қазақстан-2050» Стратегиясы қалыптасқан мемлекеттің жаңа саяси бағыты» атты Қазақстан Республикасының Президенті Н.Ә.Назарбаевтың Қазақстан халқына Жолдауын талдауға арналған «Жаңа саяси бағыт – Мәңгілік Ел болу бағдаршамы» атты дөңгелек үстел ұйымдастырылды. Ұжымның оқытушы-профессорлар құрамы және өзге де зиялы қауым өкілдері  Жолдауға жан-жақты талдау жасады.

Белгілі ғалым, профессор, әдебиеттану ғылымының майталманы, «Абай жолы» роман-эпопеясының шын мәніндегі зерттеушісі, «Шын шеберлік», «Абай жолы айшықтары» атты монументалді монографиялардың авторы, ғылымның ауыр жүгін арқалап ғұмыр кешкен Әбіш Байтанаевтың ғылым көкжиегінде өз ізі қалды. «Байтанаев оқулары» Халықаралық ғылыми тәжірибелік конференциясы өткізіліп, жер-жерден ғалымның шәкірттері, пікірлес, ниеттес ғалымдар, жалпы әдебиет сүйер көпшілік өздерінің жүрекжарды лебіздерін білдірді, ғалымның жары, бір ғасыр жасап отырған филология ғылымдарының кандидаты, әдебиетші, саттартанушы Мырзай Алтынбекованың шығармашылығы туралы да өз ойларын ортаға салды. «Байтанаев оқулары» конференциясында кітап көрмесі ұйымдастырылып, ғалымның ғылыми-әдеби шығармашылығы бейнеленген кадрлар көрсетілді, екі томдық жинақ шығарылды.

15 маусым күні институтымыздың түлегі, Р.Б. Сүлейменов атындағы Шығыстану институтының директоры, ғалым Шейх Әбсаттар қажы Дербісәлімен кездесу өтті. Кездесуге ардагер ұстаздар, оқытушы- профессорлар мен студенттер қатысып, рухани күш, ғибратты әсер алды.

       Институт базасында ашылған  еліміздің мақтанышы Жансая Әбдімәлік атындағы «Шахмат мектебі» болашақ гроссмейстерлерді дайындауда.

Студенттерден құрылған «Елбасы серіктестері» атты ынталы топ мемлекет басшысының идеяларын қолдауда Оңтүстік Қазақстан облысында  белсенді жұмыс атқаруда.

Кәсіптік білім мамандығын өндіріс жағдайымен пара-пар ету және дуальды білім беруде тәжірибе жинақтау мақсатында тігін, ағаш, темір, дәнекерлеу шеберханалары ашылып, жабдықталды.

2013  жылдың 2-қазан күні оқу ордамызда әлем таныған саясаткер, Ұлт көшбасшысы, Елбасы   Нұрсұлтан Әбішұлы Назарбаевтың барлық 200-ден астам еңбектерімен жабдықталған соңғы үлгідегі замауи технологиялармен қамтамасыз етілген «Назарбаев орталығы» ашылды. Орталықтың ашылуына елімізге танымал тұлғалар Мырзатай Жолдасбеков, Өмірзақ Айтбаев, Шейх Әбсаттар Дербісәлі келіп қатысты. Орталықтың ерекшелігі – тәулік бойы қызмет көрсетеді.

2013 жылдың қазан айында  Елбасының «Когда мысль – материальна» атты кітабының тұсаукесер рәсімі болды.

     Үш жыл мерзімінде институтта түрлі деңгейдегі 21 ғылыми-тәжірибелік конференция ұйымдастырылып, жоғары деңгейде өткізілді. Барлық конференция материалдары жинақ болып шығарылды. Атап айтар болсақ, 2013 жылдың  18-мамырында «Байтанаев оқулары-1: халықаралық білім беру кеңістігіне қазіргі кезеңдегі педагог мамандарды даярлау үрдісін интеграциялау мәселелері» атты халықаралық ғылыми-тәжірибелік конференция, осы жылдың 18-19-қазан күндері М.С.Сәрсембаевтың 100 жылдығына арналған «ұстаз – ұлттың тірегі» атты Республикалық ғылыми-практикалық конференция, «Бектаев оқулары – 1: Ақпараттандыру – қоғам ДАМУЫНЫҢ БОЛАШАҒЫ» атты халықаралық ғылыми-тәжірибелік конференция, 2014 жылдың 11-12 сәуір күндері «География» кафедрасының ұйымдастыруымен Қаныш Имантайұлы Сәтбаевтың 115 жылдығына арналған «АЛАШТЫҢ ТҰҢҒЫШ АКАДЕМИГІ» атты Халықаралық ғылыми-практикалық конференция өткізілді. Сонымен қатар,  2014 жылы 12-17 сәуірде «ҚАЗАҚСТАН-2050» СТРАТЕГИЯСЫ: ҒЫЛЫМ, БІЛІМ, ИННОВАЦИЯ ЖӘНЕ ЖАСТАРДЫҢ ҒЫЛЫМИ-ШЫҒАРМАШЫЛЫҚ ІЗДЕНІСТЕРІ» атты жаратылыстану, әлеуметтік-гуманитарлық ғылымдар бойынша жас ғалымдар мен студенттердің ІІІ ғылыми-тәжірибелік конференциясы болды.

2014 жылдың 14-15 наурыз күндері институтта «Бәсекеге қабілетті қоғам тірегі –  Ұстаз: «Мәңгілік Ел» - Ұрпақтың мәңгілік болашағы» атты Республикалық ғылыми-тәжірибелік конференция ұйымдастырылып, 9 ЖОО-ы  мен ғылыми мекемелер арасындағы  ынтымақтастық туралы меморандумға қол қойылды.     

Институтта үш ай сайын қазақ, орыс, ағылшын тілдерінде «ОҚМПИ Хабаршысы – Вестник ЮКГПИ» ғылыми журналын шығаруға арнайы лицензия алынды.

Студенттердің археологиялық іс-тәжірибе барысында тапқан ірілі-ұсақты жәдігерлерінен тұратын арнайы көрме залы бар.

       Биылғы жылы облыс бойынша тұңғыш рет институт базасында IELTS  халықаралық тестіне тіркеу және қабылдау орталығы ашылды.

Ұлыбританияның Оксфорд университеті тарапынан Институт «Аймақтар арасындағы ең үздік жоғары оқу орны» деп танылып, сертификат тапсырылды (South-Kazakhstan State pedagogical institute, Republic of Kazakhstan. Rector Onalbay Ayashev. Has been recognized as one of the «Best Regional Institutes». The Socrates Committee. Oxford, 2013).

Институттағы оқу үдерісі заман талабына сай ұйымдастырылған. Кредиттік технологияның негізгі талаптары енгізілген. Оқу орнының құрылымы «Назарбаев университеті» үлгісінде қайта жасалып, мамандықтар 4 ғылыми мектепке топтастырылған. Ғылыми мектептерге толық академиялық еркіндік берілген.

 Үш жылдық еңбекті талдау нәтижесіне Қазақстан Республикасы Ұлттық бизнес рейтингісі нәтижесінде Институт «Сала көшбасшысы - 2014», ректор «2014 жылдың басшысы» номинациясына ие болды, осы ұйымның ұйымдастыру алқасының шешімімен ол «Қазақстан экономикасы, Даңқ жұлдызы» орденімен наградталды.