ЫСҚАҚ БЕГМАН
педагогика ғылымдарының кандидаты, профессор
Ысқақ Бегман 1940 жылы Оңтүстік Қазақстан облысы, Төлеби ауданы, Аққұм ауылында дүниеге келген. 1957 жылы Георгиевка ауылындағы К. Ворошилов атындағы №1 орта мектепті бітірді.
1965 жылы Шымкент педагогикалық институтын бітірді. Осы жылдан бастап облыс мектептерінде қазақ тілі мен әдебиеті пәнінен сабақ берді. Жемісті еңбегі үшін 1975 жылы «Халық ағарту ісінің үздігі» төсбелгісімен марапатталып, 1977 жылы Оқу министрлігінен әдіскер-мұғалім деген атақ алды.
1982 жылы РСФСР оқу министрлігі ұлттық мектептер ғылыми зерттеу институтының Ғылыми кеңесінде «Қазақ тілінен сыныптан тыс жұмыстардың методикасы» деген тақырыпта кандидаттық диссертациясын қорғап шықты. 1991 жылы 23 мамырында КСРО халық ағарту комитетінің шешімімен доценттік ғылыми атағы берілді. 1998 жылы Қ.А.Ясауи атындағы Халықаралық қазақ-түрік университеті Сенатының шешімімен университет профессоры ғылыми атағы берілді.
1979 жылы Шымкент педагогикалық институтының психология кафедрасында аға оқытушы, 1994 жылы ХҚТУ ШИ педагогика және филология пәндерін оқыту әдістемесі кафедрасының меңгерушісі, 1996 жылдан 2005 жылға дейін түркітаным кафедрасының меңгерушісі, 2005-2011 жылдарда түркітаным, қазақ тілі кафедрасының профессоры қызметін атқарып келді. 2011 жылдан ОҚМПИ қазақ тілі және әдебиет кафедрасының доценті қызметінде және «Қазақ тілін оқыту әдістемесі», «Бастауыш сыныптарда қазақ тілін оқыту әдістемесі» пәндерінен дәріс береді.
Бегман Ысқақ бірнеше ғылыми-әдістемелік еңбектердің авторы. Жүзге тарта ғылыми мақалалар жариялады. «Тіл дамытудың ғылыми негіздері» (1997), «Қазақ тілінен сыныптан тыс жұмыстар» (2000), «Бастауыш сыныптарда шығарма жаздыру» (2005), «Мазмұндама жаздыру әдістемесі» (2005), «Диктанттар жинағы 3-4 сыныптар» (2005), «Бастауыш мектепте кластан тыс жұмыстар» (2006), «Қазақ тілі» ( 2006), «Төте жазу әліппесі» (1999), «Мақал-мәтелдер» (2007), «Қазақтың қанатты сөздері» (2007), «Жұмбақтар» (2007), «Жаңылтпаштар» (2007), «Қазақ тілін оқыту әдістемесі пәні бойынша курстық жұмысқа нұсқау» (2005), «Мұғалімнің кәсіби біліктілігін өзіндік бақылау» (2006), «Кестелі грамматика» (2009), «Жоғары мектеп лингводидактика негіздері» (2010) деген еңбектерін студенттер пайдалануда.
1982 жылы «Халық ағарту ісінің үздігі» атанды, 1989 жылы «Әдіскер мұғалім» атағы берілді. 2007 жылы «Менің Отаным – Қазақстан» атты республикалық шығармалар байқауының бас жүлдегері. 2009 жылы ҚР Білім және ғылым министрлігінің «Жоғары оқу орындарының үздік оқытушысы» мемлекеттік грантының иегері атанды.